Physical Address
304 North Cardinal St.
Dorchester Center, MA 02124
الساعة 2:00 الظهر – بداية المعركة
أول لقمة رنجة دخلت… ولسه الجو هادي.
أنت مبسوط، الرنجة طعمها حلو، الطحينة عاملة شغل، والبصل شغال في الخلفية كأنه موسيقى تصويرية.
لسانك بيقولك:
“إيه الجمال دا؟ إحنا ليه ما بناكلهاش كل يوم؟!”
جسمك من جوه لسه مش واخد باله… مستغرب، بس ساكت.
الساعة 4:00 العصر – الجسم يبدأ يفهم
المعدة بدأت تبعت إشارات:”هو إحنا بنأكل مخلل؟ ولا سمك؟ ولا الاثنين مع بعض؟!”
والكُلى بتقولك:
“فين الميّة يا جماعة؟ فيه حالة جفاف بتبدأ هنا!”
هنا تبدأ أول موجة عطش خفيف…
تحس إنك محتاج كباية ميّة، بعدها بكباية، بعدها بكوباية، وبعدها تقول:
“هو أنا في الصحراء؟ ولا في سفرة شم النسيم؟”
الساعة 7:00 – الدماغ تدخل المعركة
لو أكلت كمية محترمة من الرنجة، ممكن دماغك تبدأ تقولك:
“حاسس بخفة؟ ولا دي دوخة خفيفة؟”
“ولا ده الصوديوم طلع السقف؟!”
الضغط ممكن يطلع، أو ينزل، أو يعمل زي مؤشر البورصة…
بس الأكيد؟ دماغك بتقولك “إحنا محتاجين لبن أو زبادي بأي شكل”.
الساعة 9:00 – النَفَس!
هنا بتبدأ واحدة من اللحظات الحرجة…
بتمسك موبايلك تتكلم حد؟
هو بيرد يقولك:
“أنت بتاكل إيه؟ الريحة طلعت من السماعة!”
حتى بعد ما تغسل سنانك 3 مرات، وتشرب نعناع، وتاكل لبان، نفسك بيقولك:
“أنا ابن الرنجة، وأفتخر!”
منتصف الليل – “كابوس الرنجة” يبدأ
تحاول تنام… بس بطنك مش سايبة لك فرصة:
- أصوات بتطلع كأنها فيلم رعب
- سخونة غريبة
- قلبان بسيط
- وتقول لنفسك: “هو أنا واكل سمك؟ ولا مشترك في تحدي على تيك توك؟!”
تحس إنك شايل بحر في معدتك، ونفسك تفتح شباك وتنادي:
“مَيّه يا ناس!!”
تاني يوم الصبح – “صباح الخير يا بطل!”
تصحى تاني يوم ولسانك ناشف كأنك كنت بتبلّط في الصحرا
تفتح التلاجة تدور على أي حاجة فيها سوايل…
تشرب ميه، لبن، شاي، عصير، وبعدهم تفكر في شربة
وشك بيكون عامل زي اللي راجع من سباق ماراثون، وبتقول لنفسك:
“هي حلوة… بس مش كل سنة!”
وبعدها بـ يومين؟
“هو في باقي رنجة؟!”
طب إيه اللي بيحصل فعليًا جوه جسمك؟ (بجد)
بلاش هزار شوية، تعال نشوف الجسم بيعدّي بإيه بعد الرنجة:
- الملح: الرنجة فيها صوديوم عالي جدًا، وده بيعمل احتباس سوائل وبيخلّي الجسم يعطش.
- الكُلى: بتشتغل فوق طاقتها علشان تطرد الأملاح.
- الضغط: بيعلو عند ناس كتير بسبب الملح الزيادة.
- المعدة: بتحاول تتأقلم مع حاجة دخلة “قنبلة ملح وبصل” في نفس الوقت.
- النَفَس: البصل والزفارة الطبيعية بتخلّي نفسك يفتكر الناس بـ الرنجة قبل ما تقول “صباح الخير”.
هل ده معناه إن الرنجة خطر؟
لأ خالص… بس:
- لو عندك ضغط عالي، أو مشاكل كُلى، أو حامل؟ خلي بالك أو كُل حتة صغيرة.
- ولو انت من الناس اللي بتاكل رنجة وبتنسى تشرب بعدها… دي مصيبة تانية!
بس عامة؟
الرنجة آمنة لو أكلتها بحكمة، وشربت بعدها كويس، وفضلت في مكان فيه تهوية
أهم نصائح علشان جسمك ما ينقلبش عليك بعد الرنجة:
- اشرب ميّه كتير قبل وبعد الأكلة
- ما تزوّدش في الكمية… حتة محترمة كفاية
- كل معاها خيار أو طماطم أو زبادي
- خلِّي اللبن جنبك قبل النوم
- ما تشويهاش في المطبخ لو لسه عندك عزومة بعديها
